Жаңартылатын энергия көздерінен өндірілетін электр қуаты он жылда 16 есеге артқан
АСТАНА. KAZINFORM - Қазақстанда жаңартылатын энергия көздерінен (ЖЭК) электр энергиясын өндіру жүйелі түрде дамып келеді. 2025 жылдың қорытындысы бойынша ірі су электр станцияларын қоса есептегенде, ЖЭК-тің жалпы электр энергиясын өндірудегі үлесі 14,5%-ды құрады.
Ұлттық статистика бюросының мәліметтерінше, ірі су электр станцияларын есепке алмағанда, бұл көрсеткіш 7%-ға жетті.
Ірі су электр станцияларын қоса есептегенде, ЖЭК-тен электр энергиясын өндіру көлемі 2015 жылғы 9,5 млрд кВт·сағаттан 2025 жылы 17,9 млрд кВт·сағатқа дейін өсті. Олардың жалпы электр энергиясын өндірудегі үлесі 10,4%-дан 14,5%-ға дейін артты.
Соңғы он жылда ірі су электр станцияларын есепке алмағанда, ЖЭК үлесі 2015 жылғы 0,6%-дан 2025 жылы 7%-ға дейін өсті.
-Сонымен қатар осы көздерден өндірілген электр энергиясының көлемі 536,5 млн кВт·сағаттан 8 693,6 млн кВт·сағатқа дейін, яғни 16 еседен астам өскен, делінген хабарламада.
Осыған дейін елімізде жаңартылатын энергетика үлесі 7%-дан 8,5%-ға өскені туралы жаздық.
