Жаңбыр, найзағай, жел: 20 тамыз күнгі ауа райы болжамы
АСТАНА. KAZINFORM — Бүгін біраз өңірде найзағай ойнап, жаңбыр жауады. Синоптиктердің болжауынша, елдің басым бөлігінде ауа райы тұрақсыз.
Атмосфералық фронттардың өтуіне байланысты республиканың басым бөлігінде тұрақсыз ауа райы болады. Найзағай ойнап, жаңбыр жауып, жл тұрады. Сондай-ақ бұршақ жаууы мүмкін.
Еліміздің солтүстігінде, орталығында қатты жаңбыр күтіледі. Тек республиканың оңтүстігінде жауын-шашынсыз ауа райы сақталады. Республика бойынша жел күшейеді, түнгі және таңертеңгі уақыттарда солтүстікте тұман болады.
Күндіз Алматы облысында +35°С, Ақтөбе, Батыс Қазақстан, Атырау облыстарында және Жетісу облысында +35+38°С, Маңғыстау облысында +38+40°С қатты ыстық күтіледі.
Қарағанды облысында найзағай ойнап, жаңбыр мен бұршақ жаууы ықтимал.
Шығыс Қазақстан облысында дауыл тұрып, бұршақ жауады. Желдің екпіні 23 м/с.
Ал Астана қаласында жаңбыр жауады. Солтүстіктен жел соғып, күндіз екпіні 15-18 м/с болады.
Айта кетейік, Токио жиілеген аптап ыстық, нөсер жаңбыр және басқа да құбылмалы ауа райының салдарынан тұрғындарды қорғау үшін жаңа шешімдерді енгізіп жатыр.
