Жапонияда толассыз жауған қар 115 адамның өмірін қиды
АСТАНА. 2 наурыз. ҚазАқпарат - Қыс мезгілінің үш айы бойы дерлік Жапонияның барлық өңірінде рекордық көрсеткіште қар жауып, анықталған мәліметтер бойынша 115 адамның өмірін қиды.
Бұл туралы ИТАР-ТАСС агенттігінен хабарлады.
Жапонияның орталық және оңтүстік өңірлерінде 26 жылдан кейін алғашқы рет 3 ай бойы ауа райының температурасы орта жылдық көрсеткіштен төмен болса, елдің солтүстік бөлігінде 11 жылдан кейін алғашқы рет ауа райының температурасы «төмен деңгейден» түсіп кетті.
Аталмыш ел үшін ерекше болып табылатын - мол қар Токиода қыстың соңғы күнінде жауды. Оның салдарынан 40-тан астам адам әртүрлі жарақатпен ауруханаға жеткізілді. Жарақат алғандардың дені тайғанақ жолда құлап немесе жол-көлік апатына түскен.
