Жапонияның «Фукусима-1» АЭС-інде радиоактивті су сыртқа ақты
АСТАНА. ҚазАқпарат - Жапондық мамандар апатты "Фукусима-1" АЭС аумағында жер үстінде орналасқан сұйықтық сақтайтын қоймадан радиоактивті заттардың жоғары мөлшері бар судың ағып кеткенін анықтады, деп хабарлайды ҚазАқпарат ТАСС ақпараттық агенттігіне сілтеме жасап.
Стансы операторы Tokyo Electric Power (TEPCO) компаниясынан мәлім еткендей, аққан сұйықтық көлемі 32 литрді, ал ондағы бета-сәулелегіш заттардың құрамы 1 литр суға 590 мың беккерельді құрады. Теңізге жіберуге рұқсат етілетін негізгі норма 1 литр суға 150 беккерель. Апат салдарын жою үшін TEPCO қызметкерлері радиоактивті сұйықтықтың бір бөлігін су қоймаларының бірінен екіншісіне айдаған.
Айта кетейік, қазіргі уақытта "Фукусима-1" аумағында радиоактивті сұйықтықтың ағуы мен жерасты суларының зақымдануының алдын алу үшін топырақты қатыру жұмыстары жүргізілуде. Мемлекеттік бюджеттен бағдарламаға 32 млрд. иена көлемінде (шамамен $318 млн) қаржы бөлінді. "Фукусима-1" АЭС-те апат 2011 жылы наурыз айында орын алған еді. Цунами салдарынан стансының энергия және салқындату жүйелері істен шыққан болатын.
