Жарнамасы күшті сабындардың зияны көп болуы мүмкін
Мeddaily.ru-дың хабарлауынша, АҚШ-тың Азық-түлік және медикаменттер жөніндегі басқармасы қол жууға арналған антибактериялық заттардың бәрін тексергелі отыр. Мамандардың айтуынша, мұндай өнімді өндірушілер олардың ағзаға қауіпсіз екенін дәлелдеуі қажет. Өйткені бактериядан тазартқыш сабындар құрамындағы триклозан және триклокарбан заттарының, керісінше, кейбір инфекциялардың төзімділігін арттыратыны анықталды. «Кейбір жаңа мәліметтер бактерияға қарсы сабындардың пайдасынан зияны көп екенін көрсетіп отыр. Бактериялардың мұндай сабындарға еті үйреніп кететіні өз алдына, сонымен бірге жануарларға жасалған сынақ нәтижесінде тазартқыштардың гормондық ауытқуларға соқтыруы мүмкін екені де белгілі болды», - деп жазады «Алаш айнасы» басылымы микробиолог Коллин Роджерстің сөзіне сілтеме жасап.