ЖИ технологияларын «электронды үкімет» платформасына имплементациялау биыл басталады
АСТАНА. KAZINFORM — Жасанды интеллект технологияларын «электрондық үкімет» платформасына имплементациялауды биылдан бастау қажет. Бұл туралы бүгін Үкімет отырысында Премьер-Министр Олжас Бектенов айтты.
«Жолдауда цифрландыру және жасанды интеллектті енгізу мәселелеріне көп көңіл бөлінді. Жасанды интеллект технологияларын «электрондық үкімет» платформасына имплементациялауды биылдан бастау қажет. Осы жылғы желтоқсанда жұмыстың алғашқы нәтижелерін қорытындылауға тиіспіз», – деді Үкімет басшысы.
Сондай-ақ, Премьер-Министр 2025 жылы Ұлттық жасанды интеллект орталығын іске қосу және Каспий теңізі арқылы талшықты-оптикалық байланыс желілерін жүргізу жұмысын аяқтау тапсырылғанын еске салды.
«Осыған байланысты Цифрлық даму министрлігі бір ай мерзімде мүдделі мемлекеттік органдармен бірлесіп, нақты іс-шаралар мен жауапты орындаушылар көрсетілген тиісті іс-қимыл жоспарларын әзірлеп, бекітуі қажет. Бұл ретте жаңа дата-орталықтардың құрылысын аяқтау жұмысын жеделдету және телекоммуникациялық желі ресурстарын белсенді іске қосу маңызды», - деді Олжас Бектенов.
