Жастар ресурстық орталығы арқылы 3,3 мың адам тұрақты жұмысқа орналасты
НҰР-СҰЛТАН. ҚазАқпарат – Елордада «Астана Жастары» орталығы арқылы бір жылда 3 мыңнан астам жас тұрақты жұмысқа орналасты, деп хабарлайды ҚазАқпарат.
Елорда әкімдігінен мәлім еткендей, бүгінде «Астана Жастары» Жастар ресурстық орталығы арқылы жұмыссыз жүрген көптеген адам тұрақты қызметке орналасты.
«Нұр-Сұлтан қаласы Жастар саясаты мәселелері басқармасының бағыттарының бірі – жастарды жұмыспен қамту. Бұл бағытта ауқымды жұмыстар жүргізіліп жатыр. 2020 жылдың басынан бері еңбекке орналастыру мәселесімен 9 751 жас жолықты. Жұмыссыздықтан әлеуметтік қорғау шараларымен 7 452 жас қамтылды. Оның ішінде тұрақты жұмысқа 3 368 адам, жастар практикасына – 552, әлеуметтік жұмыс орындарында – 39, қоғамдық жұмыстарға – 863 және қысқа мерзімді оқуға 38 адам жолданды», - деді Жастар саясаты мәселелері басқармасының басшысы Қайрат Қамбаров.
Сонымен қатар Жұмыспен қамту жол картасын жүзеге асыру аясында 2 592 адам жұмысқа орналасты. Сол сияқты жастарды жазғы уақытта жұмыспен қамтуға, студенттік құрылыс және «Жасыл ел» еңбек жасақтары жобасы жүргізіледі. Жоба аясында маусым-тамыз айларында жұмыссыз студент пен көпбалалы отбасылардан шыққан 1 200-ге жуық жас қамтылды. Оның ішінде 731-і - көпбалалы отбасылардан шыққан.
«Басқарма 2016 жылдан бастап 300-ден астам ұйымдармен мемарандумға отырып, «Astana job» жобасын жүзеге асырып келеді. Бұл жоба бойынша 3000-ға жуық жас жұмысқа орналасты. Күніне 5 вакансия, ал жұмыс іздеушілерден 10-ға жуық түйіндеме түсіп отырады. Бұл бағыттағы жұмыс ары қарай да жалғаса береді. Біз жұмыс іздеп жүрген жастарды және жұмыс ұсынушыларды ынтымақтастыққа шақырамыз», - деді Қайрат Қамбаров.
⠀
Егер сіз жұмыс іздеп жүрсеңіз немесе сізге жұмысшы қажет болса, түйіндеме мен өтінімді job.astana.kz@mail.ru электронды поштасына жіберуге болады. ⠀
Сондай-ақ бос жұмыс орындары туралы ақпараттар @job_astana_jastary парақшасында жарияланып отырады.
