Жасұзақов әріптестерімен заманауи қауіп-қатерлерге қарсы іс-қимыл мәселесін талқылады
АСТАНА. ҚазАқпарат - ҚР Қорғаныс министрлігінде ҚР Қарулы Күштері басшылық құрамының оқу-әдістемелік жиындары шеңберінде «Сирия, Ирак және Ауғанстандағы қарулы шиеленістер: Қазақстан Республикасының Қарулы Күштері үшін сабақ және қорытынды» тақырыбында конференция өтті, деп хабарлады ҚазАқпаратқа ведомствоның баспасөз қызметінен.
Конференция барысында жаһандық қауіп-қатерлерге қарсы іс-әрекет жасау және заманауи «будандық» соғыс жағдайында жауынгерлік іс-қимылдарды жүргізу аспектілері бойынша бірқатар көкейкесті мәселелер талқыланды.
Сонымен бірге, заңсыз қарулы құралымдар мен үкіметтік әскерлердің іс-қимыл тактикасы, авиацияны қолдану тәжірибесі, арнайы операцияларды жүргізу әдістері мен мысал ретінде Сирия, Ирак және Ауғанстандағы қарулы жанжалдардағы әскери-саяси жағдайға баға беру егжей-тегжейлі қаралды.
Қазақстанның қорғаныс ведомствосы басшысы Сәкен Жасұзақов әскери қауіпсіздікті қамтамасыз ету әсіресе, халықаралық лаңкестікке, сепаратизм мен діни экстремизмге қарсы тұруға қатысты мәселелерде бүгінгі конференцияның өткізілу маңыздылығын атап өтті. 
