«Жау жүрек мың балада» жоңғардың рөлін сомдаған түркиялық қазақ

АСТАНА. ҚазАқпарат - Бахадыр Хәкім - Түркия қазақтарының арасынан шыққан актер. 2002 жылдан бері бірнеше фильм мен сериалдарға түскен, «ТРТ-Аваз» телеарнасында сегіз жыл бойы көрсетілген «Түркияның қазақтары» атты бағдарламаның продюсері. «Астана ақшамы» қандасымыздан алынған сұхбатты жария етті. «ҚазАқпарат» аталған сұхбатты ықшамдап, оқырман назарына ұсынады.

- Бахадыр, кино өне­ріне қалай келдің?

- Кездейсоқ. Ол кезде актерлік білі­мім жоқ еді, ешқандай кастингке де қатыспадым. Бір жерде танымал түрік режиссері Осман Сынавпен кездесіп қалдым. Өзі түсіріп жатқан сериалға шақырды. Осылайша кино өнеріне қадам бастым.

- Оған дейін немен айналысқан едің?

- Тері илеу - Ыстамбұл қазақтарының кәсібі. Біз де сонымен нәпақа айырып жүрдік.

- Отбасыңда өнерге ден қойғандар бар ма еді?

- Жоқ. Жалғыз анам - зейнеткер. Актерлікке бұрыннан қызығушы едім, інім екеуіміз бала кезімізде өзімізше көрген фильмдерімізді сала­тын­быз. Ал, Түркия қазақ­тарынан марқұм Мұстафа Өзтүрік пен әкесінің бір­неше фильмге түскенін білемін.

- Сені алғаш рет 2003 жылы, студент кезімде танымал фильмі «G.O.R.A-да» көрдім. Сол кезден бері ылғи қы­тай, жапондардың рөл­дерінде ойна й сың. Қашан «қазақ бо­ласың»?

- Иә, бірнеше фильм және сериалдарда шығыс азиялық тұрпаттағы рөлдер тиіп жүр. Атажұртымда түсірілген «Жау жүрек мың бала» фильмінде де жоңғар болып ойнадым.

Шамасы, өзім фильм түсіріп, өзіме-өзім қазақ рөлін беретін шығармын.

- Ондай жоспар бар ма?

- Алдағы жазда сондай бір істі қолға алу ойда бар. Қазір сценарийін жазып жатырмыз. Экшн-комедия болмақ.

- Сені Түркияда танымал қылған қай фильм?

- «G.O.R.A». Осы фильм­нен кейін кино өне­ріне біржола бет бұр­дым. Тіпті, кино саласын­дағы ізашарым болды десем, қателеспеймін.

- Arash-тың «Donya» әнінің клипіне қалай түстің?

- Ол клипте жапон ма­фия­сын ойнадым ғой. Түсілім жұмыстары Түр­кияда жүргізілді. Бұрын бірге жұмыс істеген топ түсірген еді. Көрермен ал­дында қалыптасқан қиық көз типажымды лайық көрсе керек, жігіттер мені сол ысқаяқ қудың образында ойнауға шақырды.

- Қазақстанға жиі келіп тұрасың ба?

- Кино саласында Қа­зақстанда да дос­тарым бар. Жиі болмағанмен, ара-тұра ат ізін салып тұрамын. Астана ұнайды, өте әдемі қала. Түр­кияда қолымнан келгенше Қа­зақстанды және қазақ­тар­ды жарнамалап жүрмін деп ойлаймын.

- Жақында еңбектерің үшін Түркияның бір уни­верситетінде арнаулы сыйлық алыпсың. Сол ту­ралы айта кетсең?

- Кыршехир қала­сын­дағы Ахи Эвран уни­вер­ситетінде Түркі әлемі қа­уым­дас­тығының «Түркі әлеміне қызмет» сыйлығын Қазақстанның Түркиядағы елшісі Жан­сейіт Түймебаев табыс етті.

- Сұхбатыңа рахмет, ойлағаның орындала берсін!

Сұхбаттасқан: Аршат ОРАЗОВ