Жауын-шашын, көктайғақ: алдағы үш күнге арналған ауа райы болжамы

АСТАНА. KAZINFORM — «Қазгидромет» РМҚ алдағы үш күнге арналған ауа райы болжамын жариялады. 

— Алдағы күндері оңтүстік циклон ҚР басым бөлігінде ауа райын анықтайтын болады. Жаңбыр мен қар түрінде жауын-шашын болады, 25-26 ақпан күндері оңтүстікте, 26-27 ақпанда түнде оңтүстік-шығыс аймақтарда қатты жауын-шашын (жаңбыр, қар), таулы аймақтарда қар түрінде болады. Жауын-шашын желдің күшеюімен, төмен қарлы боранмен және көктайғақпен бірге жүреді, — делінген хабарламада.

ҚР бойынша тұман болады деп болжанған. Түнгі уақытта ауа температурасының солтүстікте, солтүстік-батыста, елдің орталығында 8-18 аязға дейін, оңтүстікте, оңтүстік-шығыста 5-12 аязға дейін, шығыста 15-20-ға дейін, аймақтың оңтүстігінде 5 аязға дейін төмендеуі күтіледі. 

Еске сала кетейік, бұған дейін ауа райына байланысты бірнеше республикалық автожол жабылғанын жазған едік.