Жауын-шашын шақыру тәжірибесі Қазгидрометтің бақылауында — Мансұр Ошурбаев
АСТАНА. KAZINFORM — Қазақстанда бұлттарға әсер ету арқылы жауын-шашын шақыруға қатысты жүргізіліп жатқан эксперимент халықаралық ұйымдардың қатысуымен бақыланып отыр. Бұл туралы Экология және табиғи ресурстар вице-министрі Мансұр Ошурбаев Мәжіліс кулуарында мәлім етті.
Оның айтуынша, тәжірибе Дүниежүзілік метеорологиялық ұйым өкілдерімен бірлесіп жүргізілген. Экспериментті Қазақстан тарапынан Қазгидромет бақылауға алған.
— Бұл мәселе толықтай Қазгидрометтің бақылауында. Біздің тарапымыздан тек метеорологиялық деректерге, соның ішінде бұлттардың ылғалдылығына қатысты жұмыстар қарастырылады, — деді вице-министр.
Сонымен қатар ол экологиялық тұрғыдан жауған жауын-шашынға толық талдау жүргізілетінін атап өтті.
— Жалпы, әлемдік тәжірибе көрсетіп отырғандай, бұл — экологиялық тұрғыдан таза тәсіл. Ол тек су айдындарындағы су көлемін толықтыруға мүмкіндік береді, — деді Мансұр Ошурбаев.
Еске салсақ, Түркістан облысында жауын-шашын жасанды жолмен жауатынын жеткізген едік. Қазақстан өңірде технологияны пайдаланған алғашқы ел болмақ.
Осы ретте Президент Қасым-Жомарт Тоқаев БҰҰ-ның арнаулы мекемесі саналатын Дүниежүзілік метеорология ұйымы климат, ауа райы, су ресурстары және табиғи апаттардың қатерін азайту бағытындағы жаһандық ынтымақтастықты ілгерілетуде негізгі рөл атқаратынын айтқан еді.
