Жайық суы Атырауда 6 метрге жетті
АТЫРАУ. KAZINFORM – Бүгін Жайық өзеніндегі су деңгейі Атырау қаласында 6 метрге жетті. Бірақ бұл әлі шарықтау шегі емес.
Атырау облысының Төтенше жағдайлар департаменті басшысының орынбасары Руслан Шариевтың айтуынша, соңғы күндері Жайық өзенінің суы Махамбет ауданында шарықтау шегіне жеткен.
«Ал Атырау қаласында Жайық өзеніндегі су деңгейі 6 метрге дейін көтеріліп тұр. Мол су әлі келіп жатыр. Су тасқыны Махамбет ауданынан бері аққан аққан су Жайық өзенінің Атырау қаласына дейінгі бөлігін толтырып, Соколок және Сарыөзек каналдарына да құйылып жатыр. Қазір су каналдардың арнасына сыймай тұр. Әзірге Атырау қаласында су тасқыны басталатын уақытты нақты болжай алмаймыз», - деді Руслан Шариев.
Еске сала кетелік, бұған дейін тасқын су Атыраудың солтүстік бөлігіндегі елді мекендерге қауіп төндіріп тұрғанын жазған болатынбыз.
