Жедел жәрдемге күнім түспесін десең, үйде отыр: Қазақстанның бірқатар өңірінде ерекше акция өтті
НҰР-СҰЛТАН. ҚазАқпарат – Кеше кешкі сағат 21:00 кезінде Қазақстанның бірқатар өңірінде жедел жәрдем көліктері дабылды қосып, орталық көшелермен жүріп өтті. «Жедел жәрдемге күнім түспесін десеңіз, үйде отырыңыз» деген ұранмен өткен акцияның мақсаты – халыққа карантин талаптарын сақтаудың маңызын көрсету, осылайша тұрғындардың жауапкершілігін арттыру, деп хабарлайды ҚазАқпарат.
Аталмыш шара туралы Денсаулық сақтау министрі Елжан Біртанов Facebook парақшасында жазды.
«Жарайсыңдар, әріптестер. Қолдағандарыңыз үшін рахмет. Достар, тағы бір мәрте еске сала кетейін – қазір төтенше жағдай талаптарын қатаң сақтаудың маңызы өте зор. Үйде және табиғат аясында көп адам шақырып, той жасамаңыздар, сауық кешін өткізбеңіздер. Бұл әсіресе өңірлердегі халыққа тікелей қатысты. Нұр-Сұлтан мен Алматыда COVID-19 жұқтырғандар саны әлдеқайда азайды, бұл карантин талаптарын сақтаудың арқасында ғана мүмкін болып отыр. Алайда облыстарда науқастар саны күннен күнге өсіп жатыр», - деп жазады министр.
Оның айтуынша, бұл – өте жылдам тарайтын індет.
«Еліміздегі коронавирусқа шалдыққандардың 80 пайызы – осылай біреумен байланысып жұқтырған. Сондықтан 2/2/2 ережесін сақтаңыздар, бұл дегеніміз – тағы 2 апта үйде отыру, бір-біріміздің арамызда 2 метр қашықтық сақтау және екі адамнан артық жиналмау», - дейді Елжан Біртанов.
