Жеке кәсіпкерлердің медицина саласына кіруіне еш кедергі жоқ – министр

АСТАНА. KAZINFORM – Денсаулық сақтау министрі Ақмарал Әлназарова медицина саласына инвестиция құйғысы келетін кәсіпкерлерге жол ашық екенін жеткізді.

- МӘМС жүйесі аясында жеке кәсіпкерлерге мүмкіндік ашылды. Медициналық қызмет көрсететін ұйымдардың 64 пайызы жеке меншік. Алайда, біз жеке меншік ұйымдармен жұмыс істеуде цифрландыру жүйесінің ақсап тұрғанына байланысты тиісті мониторингті жүргізе алмай отырмыз. Сондықтан бұл екіжақты мәселе, біздің мақсат – халыққа медициналық қызметті тиісті деңгейде, сапалы ұйымдастыру, - деді Ақмарал Әлназарова Мәжілісте МӘМС жүйесі туралы заң жобасын таныстыра тұрып.

Одан әрі министр медицина саласына инвестиция салғысы келетін жандарға жаңалығымен бөлісті.

- Инвестиция келісімі деген жаңа тәсіл бар, бұл инвестиция құямын деген жеке кәсіпкерлерге өте оңтайлы. Бүгінде жеке кәсіпкермен Қосшы қаласында құны 28 млдр теңге тұратын аурухананың құрылысы бойынша 10 жылға келісім жасадық. Жеке кәсіпкерлердің медицина саласына кіруіне ешқандай кедергі жоқ, тариф барлығына бірдей, - дейді ол.

Айта кетейік, бүгін Мәжілісте «Міндетті әлеуметтік медициналық сақтандыру мәселелері бойынша өзгерістер мен толықтырулар енгізу туралы» заң жобасының таныстырылымы өтіп жатыр.

Еске сала кетейік, биыл 12 наурызда Мәжіліс міндетті әлеуметтік медициналық сақтандыру мәселелері бойынша өзгерістер мен толықтырулар енгізу туралы заң жобасын қарауға алды.