Желтоқсанның соңына дейін 9 заң жобасы Парламентке енгізіледі
АСТАНА. ҚазАқпарат – ҚР Әділет министрі Қанат Мусин Үкіметтің 2022 жылға арналған заң жобалау жоспарының орындалу барысын айтып берді, деп хабарлайды ҚазАқпарат.
«Үкіметтің заң жобалау жұмыстарының 2022 жылға арналған жоспары Парламент Мәжілісіне 26 заң жобасын әзірлеуді және енгізуді көздеді, 4 заң жобасы Мемлекет басшысының тапсырмаларын жедел іске асыруға байланысты жыл ішінде жоспардан алынып тасталды», - деді министр бүгінгі Үкімет отырысында.
Оның айтуынша, жыл барысында бұл жоспарға Үкіметтің 6 қаулысына түзетулер енгізілді.
9 заң жобасы бойынша Әділет министрлігіне, Үкімет пен Парламентке енгізу мерзімдері ауыстырылды. Бұл – денсаулық сақтау, мемлекеттік қызмет, жергілікті өзін-өзі басқару, блоктық бюджет, жылу энергетикасы және Салық кодексіне өзгерістер мен толықтырулар енгізу туралы заң жобалары.
«Қазіргі уақытта 22 заң жобасының төртеуіне Мемлекет басшысы қол қойды, 9-ы Парламенттің қарауында, биылғы желтоқсан айының соңына дейін Үкіметтің қарауындағы 9 заң жобасын Парламентке енгізу жоспарланған. Әзірлеуші мемлекеттік органдардың (Энергетика министрлігі, Еңбек министрлігі, Ұлттық экономика министрлігі) ақпаратына сәйкес, Үкіметтің қарауындағы 9 заң жобасын уақтылы енгізу жоспарлануда», - дейді Қанат Мусин.
