Жемқорлықпен күрес. Қазақстан неліктен Грузия жолымен жүрмейді

АСТАНА. KAZINFORM — Өзге елдерде жемқорлықпен күреске бағытталған революциялық әдіс барлық уақытта бірдей Қазақстанға сай келе бермейді.

Бұл туралы Сыбайлас жемқорлыққа қарсы іс-қимыл агенттігінің төрағасы Асхат Жұмағали Jibek Joly телеарнасының «Уәде» бағдарламасына берген эксклюзивті сұхбатында айтты.

Қазақстан неліктен Грузия сценарийін қайталамайды?

2000 жылдардың басында Грузия ішкі істер министрлігі қызметкерлерін жаппай жұмыстан босатып, мемлекеттік қызмет жүйесін қайта іске қосқан болатын. Бұл бастама жемқорлыққа қарсы қуатты әсер берген еді. Ал агенттік төрағасы Асхат Жұмағали өзгенің мұндай реформаларын басы-көзі жоқ көшіріп алу барлық уақытта тиімді болмайтындығын алға тартады.

— Елдің қандай бір тәжірибесін, халықаралық тәжірибені, құралды алып жай ғана көшіруді, оны қоғамымызда, құрылымдарымызда, мемлекетімізде қолдануды жақтамаймын. Әрбір жағдайдың, әр мемлекеттің өзіндік ерекшеліктері — тиісті құқықтық жүйесі, адамдардың сана-сезімі, адамгершілігі, мәдениеті бар, — деп санайды ол.

Осы орайда бағдарлама жүргізушісі мемлекеттік қызметшілердің жалақысын көтеру арқылы жемқорлықпен күресте жетістікке жеткен Сингапур мен Данияны мысалға келтіре отырып, Қазақстанда да мұндай бастама жұмыс істеуі мүмкін бе екендігін сұраған болатын.

Асқар Жұмағалидың айтуынша, шенеуніктердің табысының артуы шынымен де олардың пара алуға деген ынтасын төмендетеді. Бүгінде бұл еліміздегі жемқорлыққа қарсы шаралардың бөлігі саналады.

— Әрине, егер мемлекеттік қызметші өзінің міндеттерін лайықты деңгейде орындаса және әлеуметтік пакеті болса, онда жақсы жалақы алады. Бұл жемқорлық әрекет мүмкіндігін және оны жасауға деген ниетті айтарлықтай төмендетеді, — деді ол.

Бұған дейін Антикор басшысы еліміздегі цифрлық «боялған» ақша жобасының алғашқы нәтижесі жайлы айтып бергенін жазған едік.

Бұдан бөлек ол мемлекеттік қызметшілер тексеруші органдардан қорқатындықтан шешім қабылдау барысында жиі қауіптенетінін атап өтті.