Жерлесіміз Д. Кузин конькимен жүгіру спортынан Азияның жаңа рекордын орнатып, Азиада чемпионы атанды, еншімізде 22 алтын

АСТАНА. 4 ақпан. ҚазАқпарат - Бүгін қазақстандық спортшы Денис Кузин конькимен жүгіру спортынан 1500 метрге жарысудан Азияның жаңа рекордын орнатып, 7-Қысқы Азия ойындарының чемпионы атанды. Осылайша Қазақстан құрамасының қоржыны 22-алтын жүлдемен толықты.

Астанадағы конькимен жүгіру жабық стадионында өткен жарыста Д. Кузин аталмыш қашықтықты 1 минут 47,37 секундта жүгіріп өтті. Бұл құрлықтың бұрынғы рекордынан 1,76 секундқа жақсы көрсеткіш. Бұл жарыста оңтүстіккореялық спортшы Мо Тае Буму (Mo Tae Bum) күміс жүлдегер атанды. Ол жерлесімізге 0,34 секундқа ұтылып қалды. Қола медальді де тағы бір оңтүстіккореялық Ли Кью Хьюк (Lee Kyou Hyuk) иеленді. Ол Кузинге 1,29 секундқа ұтылып қалды. Атап өтерлігі, осы жарыс кезінде бес бірдей конькимен жүгіруші спортшы қашықтықты Азияның бұрынғы рекордына қарағанда жылдам жүгіріп өтті.