Жетісу облысында 6 мыңнан аса оқушы міндетті медициналық тексерумен қамтылмаған
ТАЛДЫҚОРҒАН. ҚазАқпарат - Жетісу облысының прокуратурасы оқушылардың құқығын қорғап, олардың тегін медициналық тексеруден өтуін қамтамасыз етті, деп хабарлайды ҚазАқпарат тілшісі.
«Заңнамада медициналық көмектің кепілдік берілген көлемін тегін алу, оның ішінде кәмелетке толмағандардың жыл сайынғы «Скринингтен» өту құқығы бекітілген. Бірақ, облыстың медициналық ұйымдары 6 мыңнан астам кәмелетке толмаған оқушыны міндетті медициналық тексерумен қамтыған жоқ. Осы жайтқа прокуратураның ден кою актісінің нәтижелері бойынша барлық кәмелетке толмағандар профилактикалық тексеруден өтті», - делінген Жетісу облысы прокуратурасы баспасөз қызметінің хабарламасында. Жыл басынан бері облыс прокуратурасы 10 мыңнан астам кәмелетке толмағандардың құқықтарын қорғады.
