Жетісу облысында Сиверс алмасының тұқымын сақтап қалуға арналған фестиваль өтті

ТАЛДЫҚОРҒАН. ҚазАқпарат – Жетісу облысындағы Сарқан ауданында Сиверс алмасының гүлденуіне арналған фестиваль өтті, деп хабарлайды ҚазАқпарат тілшісі.

Жылдағы дәстүр бойынша Теректі өзенінің жағасында Сиверс алмасының гүлденуіне арналған фестиваль өтті. Шараның басты мақсаты – жабайы алма ағаштың осы тұқымының жойылып кетпеуіне жағдай жасау арқылы өңірдегі тау туризмін дамыту.

Тау жағалай өсетін бұл жабайы алманың түрін тек Сарқан жерінде кездестіруге болады. Бор дәуірінен осы күнге дейін сақталып келген жабайы алманың 40-қа жуық түрі Жоңғар-Алатауы табиғи ұлттық паркінің аумағында ерекше қорғалған. Бүгінде, табиғи саябақтың 38 мың гектарын жабайы Сиверс алмасы алып жатыр.

Шара аясында «Алтын адам» Жетісу шеберлері қолөнер бұйымдарының көрмесі өтті. Ұлттық спорт түрлерінен тартысқа толы жарыс та ұйымдастырылды.

Салтанатты шара шымылдығын аудан әкімі Ғалымжан Қанатұлы ашып, жиылған жұртшылықты мерекемен құттықтады. Сонымен қатар, фестивальге қазақ эстрадасының жас әншілері Kalifarniya және «Қазақстан дауысы» мега жобасының қатысушысы Qanay келіп, әсем әндерінен шашу шашты.

«Қазақстанның барлық жері өзіне тән сұлулығымен көркем табиғатымен ерекшеленеді. Соның ішіндегі жер жәннаты саналатын Жетісудің табиғатына тамсанбайтын адам жоқ. Бүгінгі фестиваль де Жетісудың тағы бір әсем жері Сарқанда жоғарғы деңгейде өтті. Біздің басты мақсатымыз – жабайы алма тұқымын сақтап қалу. Бүкіл әлемге осы жердің барлық алманың ежелгі түп атасы екендігін одан әрі паш ету. Әрине, бұдан бөлек экологиялық туризмді дамытуға жағдай жасау», - деді экология және тұрақты даму институтының директоры Құралай Карибаева.

Бүгінгі фестиваль аясында 100 түп алма ағаш көшеті отырғызылды.