Жетісу облысында боранды түнде жолда тұрып қалған көліктерден 73 адам құтқарылды

АСТАНА. KAZINFORM – Бүгін түнде Жетісу облысы бойынша ақтүтек боранда жолда тұрып қалған көліктерден 73 адам құтқарылды, деп хабарлайды ҚР Төтенше жағдайлар министрлігінің баспасөз қызметі.

Баспасөз қызметінің мәліметтеріне қарағанда, түнде Жетісу облысы Кербұлак ауданында, республикалық маңызы бар «Сарыөзек – Қоктал» автожолында ТЖМ қызметкерлері 71 адамды, оның ішінде 10 баланы құтқарды.

- Қарда 19 жеңіл көлік пен 2 жүк көлігі тұрып қалған болатын. Барлық құтқарылған адамдар Сарыөзек ауылына жеткізілді. Сондай-ақ, жолдың тазартылған учаскесіне 15 жеңіл автомобиль сүйретілді, оларда 38 ересек адам болды - олар өз бетінше қозғалысты жалғастырды.

Алакөл ауданында, «Ұшарал-Достық» автожолында, Коктұма стансасынан 10 км қашықтықта, ТЖД күштері қар құрсауында қалған жеңіл көліктен 2 адамды құтқарып, Коктұма стансасына жеткізді,-делінген хабарламада.

Медициналық көмекке ешкім мұқтаж болған жоқ.

Осыған дейін Жетісу облысында ауа райына байланысты көлік қозғалысына шектеу қойылғаны туралы жаздық.