Жезқазғанда елімізде құрастырылған жаңа автобустар жолға шықты
ЖЕЗҚАЗҒАН. ҚазАқпарат – Жезқазғанда қоғамдық көлік паркі жартылай жаңарды. Саран қаласындағы зауытта құрастырылған жиырма жаңа автобус желіге шықты, деп хабарлайды ҚазАқпарат тілшісі.
Жаңа автобустар төрт қалалық маршрутқа қызмет етеді– № 1, 3, 6, 8. Жезқазғандықтар жаңа көліктің жайлылығына оң баға берді.
«Автобустар заманауи, Саран қаласындағы «QazTehna» ЖШС зауытында жасалған. Олар «Евро-5» стандартына сәйкес келеді, бейнебақылаумен, пандустарды көтеру жүйелерімен, кондиционерлермен жабдықталған. Бір автобустың сыйымдылығы – 51 адам», - деді Жезқазған қаласының тұрғын үй-коммуналдық шаруашылық және автомобиль жолдары бөлімі басшысының орынбасары Аслан Арынов.
Жезқазғанда барлығы 13 маршрут бар – 9 қалалық және 4 қала маңы.
«Болашақта біз қалада ONAY электронды жолақы төлеу жүйесін іске қосуды жоспарлап отырмыз. Барлық жаңа автобустар сандық жүйелермен және GPS-құрылғылармен жабдықталған. Бұл City-Bus мобильді қосымшасын әзірлеуге және қолданысқа енгізуге мүмкіндік береді, ол арқылы тұрғындар қоғамдық көліктің қозғалысы туралы ақпарат ала алады», - дейді Аслан Арынов.
