Жигули Дайрабаев Маңғыстау облысының өндіріс ошақтарын аралады

АҚТАУ. ҚазАқпарат – ҚР президенттігіне кандидат Жигули Дайрабаев Маңғыстау облысына барды, деп хабарлайды ҚазАқпарат «Ауыл» халықтық-демократиялық патриоттық партиясына сілтеме жасай отырып.

Ең алдымен кандидат Мұнайлы ауданында орналасқан «Сауқымбек» ұн тарту зауытының ұжымымен кездесті. Бірнеше жыл бұрын іске қосылған өндіріс ошағы жоғары сұрыпты ұн өндіріп, 70-ке жуық адамды тұрақты жұмыспен қамтамасыз етіп отыр.

Ұн тарту зауытынан кейін кандидат мал бордақылау кешеніне барды. Сонымен қатар Жигули Дайрабаев Мұнайлы ауылының тұрғындарымен кездесті. Кездесу барысында жем-шөп дайындау мәселесіне ерекше назар аударылды.

Бұған дейін Жигули Дайрабаев бастаған үгіт-насихат тобының өкілдері Жамбыл, Түркістан, Қызылорда, Ақтөбе, Ақмола, Қарағанды, Павлодар, Жетісу, Алматы, ШҚО, Абай облыстарының сайлаушылармен кездесті.

Естеріңізге сала кетейік, сайлау алдындағы үгіт-насихат 2022 жылғы 21 қазанда басталды және сайлаудан бір күн бұрын, яғни 19 қарашада аяқталады. 19 қараша – республика бойынша тыныштық күні. Ал, 20 қарашада президент сайлауы өтеді.