Жылқы еті әлеуметтік маңызы бар тауарлар тізбесіне кіруі мүмкін

АСТАНА. KAZINFORM — Мәжілісте өтіп жатқан дөңгелек үстелде жылқы еті әлеуметтік маңызы бар тауарлар тізбесіне енуі мүмкін екені айтылды.

Мәжіліс депутаты Қазыбек Әлішев жылқы етін тұтынушылардың үлесі жылдан-жылға артып келе жатқанын айтып, неге ол әлеуметтік маңызы бар тауарлардың тізбесіне қосылмай келе жатқанын сұрады.

Бұл сұраққа Сауда және интеграция вице-министрі Жанель Күшікова жауап берді.

— Ешқандай кедергі жоқ. Біз ол ұсынысты қарайық. Ондай мәселе осыған дейін көтерілген жоқ. Әлеуметтік маңызы бар тауарлардың тізімі баяғыдан ел ішінде жоғары қолданысқа ие өнімдерден жасақталып, қалыптасқан. Біз оны кезең-кезең сайын қарап отырамыз. Ол тауарлардың бағасы қол жетерліктей болу керек, — деді Жанель Күшікова.

Өткен айда, Сауда және интеграция вице-министрі Қайрат Төребаев ел өңірлерінде сиыр етінің бағасы өскенін растаған еді.