Жизель Пеликоның ісі: Франция прокуратурасы ең жоғары жаза тағайындауды сұрады
АСТАНА.KAZINFORM — Жылдар бойы зорлық-зомбылық көрген француз әйелі Жизель Пеликоның соты әлем назарын өзіне аударды. Оның бұрынғы күйеуі Доминик Пелико қылмысын мойындады, деп жазады Euronews.
Француз прокурорлары Жизель Пеликоның бұрынғы күйеуі Доминикті 20 жылға дейін бас бостандығынан айыруды сұрады. Ол 2011 мен 2020 жылдар аралығында әйеліне есірткі беру арқылы оны ес-түсінен айырып, бөгде адамдарға зорлауға рұқсат бергенін мойындады.
Аталған істе өз есімінің құпиялылығын сақтаудан бас тартқан Жизель Пелико сексуалдық зорлық-зомбылыққа қарсы күрес жүргізетін белсенділердің тұмарына айналды.
Франция премьер-министрі Мишель Барнье үкімет тұрмыстық зорлық-зомбылық құрбандарын қолдауға қосымша қаражат бөлетінін айтып, қазірдің өзінде 33 мың төлем жасалғанын айтты.
Сонымен қатар, ол 2025 жылдың соңына қарай тұрмыстық зорлық-зомбылық туралы арыз беру тәртібі жеңілдейтінін айтты.
5 қыркүйекте Жизель Пелико төрт жыл бойы басынан қандай қиын жағдай кешкенін алғаш рет көпшілік алдында айтты. Францияның ірі қалаларында оны қолдауға арналған митингілер өтті.
