Жоғарғы Сот Қайрат Жамалиевтің жазасының қысқартылуын түсіндірді
АСТАНА. ҚазАқпарат - 2015 жылы 13 жылға сотталған кәсіпкер Қайрат Жамалиевке жазаны өтеу мерзімі қысқартылды. Бұл туралы «ҚазАқпарат» ХАА-ның жолдаған сауалына Жоғарғы Соттан мәлім етті.
«Кассациялық инстанция сотталушының өтініші бойынша, зардап шегушінің (Әліби Жұмағұлов) пікірін ескере отырып, сотталушы Қайрат Жамалиевтің әрекетін ҚР ҚК 194-бабының 4-бөлігі 2-тармақшасынан (Адамдардың тобымен күш қолдана отырып бопсалау) ҚР ҚК 194-бабы 3-бөлігі 2-тармақшасына (Ірi көлемде мүлiкке ие болу мақсатымен бопсалау) ауыстырды», - делінген Жоғарғы Соттың жауабында.
ҚР ҚК 194-бабы 3-бөлігі 2-тармақшасы мүлкін тәркілей отырып, бес жылдан он жылға дейін бас бостандығынан айыруды қарастырады.
«Қайрат Жамалиевке орташа қауіпсіздіктегі қылмыстық-атқару жүйесі мекемесінде 7 жылға бас бостандығынан айыру жазасы тағайындалды. Қалған бөлімдерде шығарылған сот актілері өзгеріссіз қалдырылды. Процессуалды заңнаманың талаптарына сәйкес, қылмыстық іс жабық сот отырысында қаралды», - деп түсіндірді Жоғарғы Сотта.
Ведомстводан атап өткендей, кейбір БАҚ-тарда Қ.Жамалиевтің мерзімінен бұрын шартты түрде босатылуы мүмкіндігі туралы жарияланған ақпарат еш негізсіз және болжам ғана болып табылады.
