Жол-көлік оқиғаларының алдын алудың онкүндігі басталды
АСТАНА. ҚазАқпарат - Бүгін Қазақстанда жолдағы жарақаттану мен өлім-жітімнің көрсеткішін төмендету мақсатында ҚР ДСӘДМ салауатты өмір салтын қалыптастыру проблемалары Ұлттық орталығының ұйымдастыруымен жол-көлік жарақаттануларының алдын алудың жыл сайынғы «Назар аударыңыз, бағдаршам!» онкүндігі басталды.
«Онкүндік аясында республиканың барлық аймақтарында жол жүру ережелері туралы білім деңгейін көтеруге, дәрігерге дейінгі алғашқы көмекті көрсету қағидалары туралы, өзін-өзі сақтау мінез-құлқын қалыптастыруға бағытталған барлық мүдделі тараптардың қатысуымен дөңгелек столдар, дебаттар, баспасөз конференциялары, семинар-тренингтер сияқты іс-шаралар өткізіледі. ҚР ДСӘДМ травматология және ортопедия ғылыми-зерттеу институтының мәліметінше, жыл сайын республикада жол-көлік апаттары салдарынан 3 мыңға жуық адам қайтыс болып, 25 мыңдай адам әртүрлі дәрежедегі жарақаттанулар алады, сонымен бірге, орта есеппен 1 мың адам мүгедекке шалдығады. ЖКО-дан болатын өлім сыртқы себеп-салдардан болатын өлім көрсеткішінің 20%-ын құрайды, оның ішінде 76,5 пайызы оқиға орнында немесе тасымалдау кезінде қайтыс болады. 2015 жылы ЖКО нәтижесіндегі жарақаттанудан болатын өлім 19 пайызға, мүгедектік 20 пайызға төмендеді»,-деп атап өтілген министрлік мәліметінде.
Жол-көлік оқиғаларынан зардап шеккен азаматтарға уақытылы медициналық көмек көрсету үшін республикалық маңызы бар автожолдарда медициналық-құтқару бекеттері құрылды. Қазақстанда мүгедектік пен өлім жағдайларының орын алмауы мақсатында жарақаттану кезіндегі медициналық көмек көрсетудің біріктірілген үлгісі енгізілуде. Ол халықты әлеуметтік қолдау, оңалту, диспансерлік бақылау, емдеу мен алдын алу кешенді шараларын қамтамасыз етеді.
