«Жолаушылар тасымалы» компаниясы фотобайқау жүлдегерін іздеуде

АСТАНА. ҚазАқпарат - «Жолаушының үздік суреті» тақырыбына жарияланған фотобайқау өз мәресіне жетті. Бұл жайында «Жолаушылар тасымалы» АҚ баспасөз қызметі мәлім етті.

Компания ақпаратына қарағанда, байқауға 100-ден астам сурет келіп түсіп, ең үздік деп танылған авторларға тиісті жүлделері табысталды. Атап айтқанда, байқаудың бас жүлдесі iPhone 7 plus ұялы телефоны  «Анашым, біз қай стансада тұрмыз?» деп аталатын суретті жіберген астаналық Серік Ақбаевқа берілді.

«Біз үшін күтпеген жағдай. Фотобайқау туралы жолаушылап бара жатып әлеуметтік желі арқылы білдік. Жұбайымның кеңесі бойынша осы суретті түсіріп жібердік. Тосынсыйға рахмет»,- деді Ақбаев.
 

Ал Азамат Ғалиулланың «Жайлаудағы көктем» жұмысы 2 орын алды. Оған iPhone 7 берілді. Үшінші орын және iPad mini гаджеті Дарын есімді жолаушыға бұйырды.

«Ол өкінішке орай өзінің толық аты-жөнін көрсетпепті. Дарын 8- (7172) 600-236 телефоны бойынша хабарласып, өз жүлдесін ала алады», - деді компания баспасөз қызметінен.

Айта кетейік, байқаудың шарты бойынша кез келген жолаушы сапар барысында қызықты да мазмұнды суреттер түсіріп жіберу керек болатын.