Жолаушылар ұшағының ұшқышы штурвалда отырып ұйықтап кеткен

АСТАНА. ҚазАқпарат - Австралияның Vortex Air әуе компаниясына тиесілі Piper PA-31 Navajo жолаушылар ұшағының ұшқышы әуеде ұйықтап кеткен. Соның салдарынан Девенпорттан Кинг аралына бара жатқан ұшақ 46 шақырым артық ұшқан, деп хабарлайды ҚазАқпарат dailymail.co.uk басылымына сілтеме жасап.

Абырой болғанда, ұшқыш оянып, ұшақты әуежайға қондыра алған. Ешкім зардап шекпеген.

The Daily Mail басылымының жазуынша, оқыс оқиға 8 қарашада болған. Бірақ бұл туралы енді хабарланып отыр.

Қазір Австралияда ұшқыштың еңбекке қабілеттілігін тексеріп жатыр.

Piper PA-31 Navajo ұшағы 1980 жылдан бері шығарылады. Ресми мәліметтер бойынша, ұшақтың экипажы екі адамнан тұрады.