Жоңғар қақпасындағы қатты жел Қытаймен жүк тасымалына ықпал етті
АСТАНА. KAZINFORM — Мамыр айында Алашаңқай станциясында алғаш рет қатты желдің салдарынан 14 төтенше дайындық режимінің енгізілуі тіркелді. Бұл туралы «ҚТЖ» ҰК» АҚ баспасөз қызметі мәлім етті.
Қытай тарапының ақпараты бойынша, 2026 жылғы мамырда Достық — Алашаңқай шекаралық өткелі арқылы кең табанды пойыздарды жоспарлы қабылдауды төмендетудің негізгі факторы Алашаңқай станциясы ауданындағы қолайсыз ауа райы болған.
— Жоспар бойынша 1,34 млн тонна болса, факт 1,29 млн тоннаны (- 4%) құрады. Бұл ретте өткен жылдың көрсеткіштеріне 1,8 млн тонна көлемінде 23% — ға өсу байқалады. Өз кезегінде, ағымдағы жылдың 5 айында ҚР мен ҚХР арасында тасымалдаудың жалпы көлемі 15,5 млн тоннаны құрады (2025 жылға қарағанда +10%). 2026 жылғы мамырда Алашаңқай станциясында пайдаланудың бүкіл кезеңінде алғаш рет бір ай ішінде 20,7 м/с жоғары жылдамдықпен қатты желдің салдарынан төтенше дайындық режимі 14 рет енгізілді, — делінген хабарламада.
Шектеулердің жалпы ұзақтығы 220 сағаттан астам (9 тәуліктен астам) құрады. Жеті жағдайда шектеулер қатарынан 20 сағаттан астам уақытқа созылды.
Қытай тарапы пойыздарды қабылдау көлемінің төмендеуі тек ауа райы факторларына байланысты екенін атап өтті.
— Теміржол әкімшіліктері тарапынан жүйелік немесе техникалық шектеулер тіркелмеген. «Жаланашкөл» Автоматты метеостанциясының деректері бойынша, өңірдегі желдің ең жоғары жылдамдығы 2026 жылдың сәуірінде 25,5 м/с, мамырда 24,5 м/с жетті. Көктұма — Достық (Жоңғар қақпасы) учаскесі желдің қатты соғатын аудандарына жатады. Қуатты ауа ағындары тасымалдау процесінің қауіпсіздігі мен ұйымдастырылуына айтарлықтай әсер етеді, бұл уақытша шектеу шараларын енгізуді талап етеді, — деп хабарлады ҚТЖ.
Айта кетейік, Қазақстанның контейнерлік тасымалы бойынша транзит теміржолдың жаңа экономикасына айналып келе жатыр.
