Жұма күні Қазақстанның басым аумағы антициклонның ықпалында болады - Қазгидромет
АСТАНА. 8 желтоқсан. ҚазАқпарат - «Қазгидрометтің» болжауынша, 9 желтоқсан күні Қазақстанның басым аумағы антициклонның ықпалында болады, бұл күн жауын-шашынсыз өтеді деп күтілуде.
Атап айтқанда, Қызылорда, Оңтүстік Қазақстан, Жамбыл, Шығыс Қазақстан, Солтүстік Қазақстан, түнде Ақмола, Қостанай облыстарында тұман түседі.
Алматы облысының кей жерлерінде де тұман басады. Жалаңашкөл аумағында секундына 18-23 метр жылдамдықпен соғатын желдің екпіні кей уақыттары 28 метрге жетуі ықтимал.
Маңғыстау, Атырау облыстарында 15-22 м/с жел мен тұман түсуі болжануда.
Алдағы тәулікте Қазақстанның өзен-көлдерінде мұз қату үдерісі жалғасады. Елдің оңтүстік, оңтүстік-шығыс және шығысындағы өзендерде мұз қатуына байланысты судың деңгейі көтерілуі мүмкін.
