Жұмағали Ысмағұлов қазақ журналистерінің ішіндегі бір сүбелісі еді - профессор Тұрсынбек Кәкішев

АЛМАТЫ. 17 қаңтар. ҚазАқпарат /Ерлік Ержанұлы/ - Жұмағали Ысмағұлов артында өшпес із қалдырған халқымыздың ардақты азаматтарының бірі болды. Бұл туралы филология ғылымының докторы Тұрсынбек Кәкішев бүгін марқұмды ақтық сапарға шығарып салу кезінде айтты.

"Жұмағали Ысмағұлов қазақ журналистерінің ішіндегі бір сүбелісі еді. Оның сүбелі болатын себебі - ҚазТАГ-тың немесе тағы басқа қызметтерде басшы болғандығынан емес, көбіне соның ғылыми негізін айқындаудағы ниетінде. Мәскеуде Жоғары партия мектебінде оқып жүріп қазақ баспасөзінің рөлі жөнінде диссертация қорғады. Одан кейін ҚазТАГ-тың басшысы боп жүрген уақытында 1986 жылғы көтеріліске қатысқан жастардың суреті басылғаны үшін жазықты болып қызметінен айрылды", -дейді Тұрсынбек Кәкішев.

Қазақтың Әл-Фараби атындағы ұлттық университеті профессорының айтуынша, Жұмағали Ысмағұлұлы бұл қызметінен айрылғаннан кейін Абайды насихаттауға көп еңбек сіңірді. Бұл еңбегі ескерусіз қалмай Абайдың 2 томдығын шығарғанда Мемлекеттік сыйлықтың лауреаты атанды. Сондай-ақ Міржақып Дулатовтың 5 томдық шығармалар жинағын шығаруға жетекші болды.