Жұмысшыларға 20 минутқа мызғып алуға рұқсат беру ұсынылды
АСТАНА. ҚазАқпарат - Көп жұмыс -күйзелістің жоғары деңгейіне жеткізуі мүмкін. Қиын тапсырмалар мен шиеленіскен жағдайлар алғашқыда адреналинді арттырып, тым жоғары белсенділік тудырады.
Алайда, бұл кезең тез өтіп, артынша физикалық және ақыл-ой әлсіреуі болады, деп хабарлайды ҚазАқпарат Zee News-қа сілтеме жасап.
Мамандар ағзаны «қайта жүктеу» үшін түскі уақытта «тынығу сағатын» енгізуге кеңес беруде.
Лидса университетінің қызметкерлері сондай-ақ келесі жайттарды анықтады: мұндай тәжірибе диабет, жүрек ауруларын, ұйқының қанбауынан туындайтын депрессиялық жағдайларды төмендетеді.
Статистикаға сәйкес, адамдардың 25 пайызы түнде 5 сағаттан кем уақыт ұйықтайды. Осы жағдайды ескере отырып, компания басшыларына кеңседе «тынығу уақытын» енгізу ұсынылуда. Олардың айтуынша, егер 14:00-ден 16:00-ге дейін 20 минутқа мызғып алса, жұмысшылардың креативті ойлау қабілеті артып, иммундық жүйенің жұмысы қалыпқа келеді. Ал, бұл өз кезегінде сырқатына байланысты жұмыстан қалушылардың санын қысқартады.
