Жыл басынан бері елдегі бензиннің құны 21 пайызға қымбаттады
АСТАНА. 14 қыркүйек. ҚазАқпарат /Жасұлан Аманбайұлы / - Жыл басынан бері елдегі бензиннің құны 21 пайызға қымбаттады. Бұл туралы бүгін брифинг барысында Статистика агенттігінің төрағасы Әлихан Смайылов мәлім етті.
«Биылғы жылдың қаңтар-тамыз айларында инфляция деңгейі 5,9 пайызды құрады. Соның ішінде жекелей тауарлардың құнына келетін болсақ, жыл басынан бері дизельдік жанар-жағармайдың бағасы 24 пайызға өскен. Өндірушілер оны 22 пайызға арттырған. Бензин 21 пайызға, газ 7,5 пайызға қымбаттады. Өңдеушілер пропан мен метан құнын 6 пайызға қымбаттатып жіберген»,-деді агенттік төрағасы.
Оның айтуынша, жазғы маусым кезеңдерінде азық-түлік бағасы 6 пайызға төмендеген. Адамдардың орташа айлығы 92 мың 993 теңгеге жеткен. Ал, 2011 жылғы қысқа мерзімді экономикалық индикатор былтырғы жылдың осы уақыт мерзімімен салыстырғанда 106,1 пайызды құрды.
