Жыл басынан бері елордада жүргізушілердің кінәсінен 93 жол апаты болды
НҰР-СҰЛТАН. ҚазАқпарат – Биылдың басынан бері елорда жолдарында 121 адам жарақат алды. Бұл туралы елордалық Полиция департаменті Әкімшілік полиция басқармасының басшысы Елжан Чупеков айтты, деп хабарлайды ҚазАқпарат тілшісі.
«2022 жылдың 3 айында қала жолдарында 113 жол-көлік оқиғасы тіркелді. Осы оқиғалардың салдарынан 121 адам жарақат алып, екі адам қаза тапты», - деді Е. Чупеков баспасөз мәслихатында.
Оның айтуынша, жол-көлік оқиғаларына жасалған талдау барысында оқиғалардың көбіне жүргізушілердің кінәлі екені анықталды. Жүргізушілердің кінәсінен 93 жол-көлік оқиғасы тіркеліп, соның салдарынан 101 адам зардап шекті.
«Есепті кезеңде көлікке мас күйінде отырған жүргізушілердің кінәсінен 4 жол-көлік оқиғасы болды», - деді басқарма басшысы.
Оның сөзіне қарағанда, кәмелетке толмағандарға қатысты 14 жол-көлік оқиғасы тіркеліп, 14 бала дене жарақатын алды.
