Жыл басынан бері Өзбекстанға 700 мыңнан астам қазақстандық турист барды

ТАШКЕНТ. ҚазАқпарат – Өзбекстанның туризм саласы қалпына келіп, жыл басынан бері шетелдік саяхатшылар ағыны 2 еседен астам өскен, деп хабарлайды ҚазАқпарат меншікті тілшісі.

Өзбекстан Республикасы Мемлекеттік статистика комитетінің мәліметінше, биылғы жеті айда елге туристік мақсатта 2,4 млн шетел азаматы барған. Бұл – өткен жылмен салыстырғанда 2,2 есе көп.

Шетелдік туристердің үштен бірі дерлік Қазақстан азаматтары болды – 716,7 мың адам. Сондай-ақ, туристік ағын көшбасшыларының үштігіне Өзбекстанмен көршілес елдер: Қырғызстан (675,1 мың турист) және Тәжікстан (637 мың) кірген.

Ресейлік сахатшылар легі – 247,2 мың адам болды. ТМД-дан тыс елдерден 124 мың турист сапар шеккен, оның ішінде Түркиядан 38,6 мың, Оңтүстік Кореядан 8,4 мың, Германиядан 8 мың, АҚШ-тан 6,3 мың.

Бұған дейін тек шілде айында ғана Өзбекстанға 180 мың қазақстандық турист барғаны хабарланған болатын.