Жыл басынан бері ұйымдасқан қылмыстық топ құру мен оған басшылық жасауға қатысты 11 қылмыстық іс қозғалды
АСТАНА. Сәуірдің 26-сы. ҚазАқпарат /Қанат Мәметқазыұлы/ - Жыл басынан бері ұйымдасқан қылмыстық топ құру мен оған басшылық жасауға қатысты 11, қарақшылыққа қатысты 4 қылмыстық іс қозғалды. Бұл туралы бүгін Парламент Мәжілісінің көшпелі Үкімет сағатында «Қазақстан Республикасындағы қоғамдық тәртіп пен қауіпсіздікті сақтаудың жай-күйі туралы»
тақырыпта баяндама жасаған ҚР Ішкі істер министрі Серік Баймағанбетов осылай мәлім етті, деп хабарлайды ҚазАқпарат.
«Қылмыстық жауапкершілікке 16 қылмыс әлемінің беделділері, 14 басшылары және 8 ұйымдасқан қылмыстық топтың қатысушылары тартылды. Бұндай қылмыскерлерді құрықтау, тексеру барысында үлкен көлемде қару-жарақ пен есірткілер тәркіленді», деді министр.
