Жыл соңындағы жағдай бойынша Астана қаласында мектептердегі орын тапшылығы 14 мыңға жуық - Ә.Бимендина
АСТАНА. 30 желтоқсан. ҚазАқпарат /Гүлмира Әлиакпарова/ - Жыл соңындағы жағдай бойынша Астана қаласында мектептердегі орын тапшылығы 14 мыңға жуықты құрап отыр.
Бұл туралы Агенттіктің тілшісіне берген сұхбатында қалалық Білім басқармасының бастығы Әсима Бимендина айтты.
Ә.Бимендинаның айтуынша, биыл «100 мектеп» бағдарламасы шеңберінде 3600 орындық үш мектеп іске қосылды. Олар: Оңтүстік-шығыс шағын ауданындағы №63, Степной гараждар кооперативіндегі №64 және Тілендиев даңғылы бойында салынған №65 мектептер.
2011 жылы аталмыш бағдарлама шеңберінде тағы төрт орта білім беру мекемесі есіктерін айқара ашатын болады. Олар: Тілендиев даңғылы бойында (1200 орын), Есілдің сол жағалауындағы әкімшілік орталықта (1200 орын), Көктал шағын ауданында (800 орын) және Ильинка кентінде (1200 орын) орналаспақ.
«Көші-қон ағынын қоса алғанда қазір мектептердегі орын тапшылығы 14 мыңға жуық. Бүгін Астанадағы 66 мемлекеттік және 13 жекеменшік мектептерде барлығы 74 мың бала білім алады», - деді ол.
