Зілзаладан кейін: Газиантепте Қазақстан салған Қожа Ахмет Ясауи мектебі ашылды
АСТАНА. KAZINFORM — Қазақстанның Түркиядағы жойқын жер сілкінісінен кейін салған Қожа Ахмет Ясауи атындағы мектебі алғашқы оқушыларын қабылдады. Білім ордасы Газиантеп провинциясының Нұрдағы ауданында бой көтерді.
Мемлекет басшысы Қасым-Жомарт Тоқаев 2023 жылдың 6 ақпанындағы жойқын зілзаладан кейін жаңа мектеп салу бастамасын көтерген еді. Жоба зардап шеккен өңірді қалпына келтіруге Қазақстанның қосқан үлесін көрсетіп, екі ел арасындағы бауырластық пен өзара қолдаудың символына айналды.
Мектептің салтанатты ашылуына KazAID Басқарма төрағасы Нұрғали Арыстанов, Газиантеп провинциясы губернаторының орынбасары Якуп Кылынчоглу, жергілікті жұртшылық өкілдері, ата-аналар мен оқушылар қатысқан.
Жаңа білім беру мекемесі 6 мың шаршы метрді құрайды және 960 оқушыға арналған. Мұнда 32 бастауыш сынып және мектепке дейінгі білім беруге арналған 4 сынып қарастырылған. Қазір мектепте 50 педагог еңбек етеді.
Оқу орнында оқушыларға сапалы білім алуға және жан-жақты дамуына қажетті заманауи инфрақұрылым жасалып, оқу үдерісіне қолайлы жағдайлар қамтамасыз етілген. Мұнда мамандандырылған сыныптар, конференц-зал, кітапхана, амфитеатр, спорт алаңы және балалардың ойын аймағы бар.
Ғимарат Түркия нормаларына сай жобаланған. Сейсмикалық қауіпсіздікке, ылғалдан және жылудан қорғауға ерекше көңіл бөлінген.
Сапар барысында KazAID Басқарма төрағасы Нұрғали Арыстанов Газиантеп провинциясы губернаторының орынбасары Якуп Кылынчоглумен кездесті. Тараптар екіжақты өзара іс-қимылдың перспективаларын және алдағы ынтымақтастықтың ықтимал бағыттарын талқылады.
Айта кетейік, Түркия мектептерінде түркі әлеміне арналған жаңа курс енгізілді.
