Зообақ фотосессия үшін пайдаланылған арыстанның күшігін сатып алды
АЛМАТЫ. ҚазАқпарат - Зообақ басшылығы науқас жануарды жекеменшік иелерінен сатып алды, деп хабарлайды ҚазАқпарат тілшісі.
Бұл туралы зообақ директоры Ержан Еркінбаев Фейсбуктегі парақшасында мәлімдеді.
«Бүгін арыстанның күшігін қабылдадық. Әлиді 2 ай бұрын бұрынғы иелерінен сатып алған болатынбыз. Осы уақытқа дейін жануар ем қабылдады.
Бұрынғы қожайындары жануарды күтіп баптамаған. Әлиде рахит белгісі айқын, ағзалары уланған, бауыры 3 есе үлкейген, тырнақтары түбінен кесілген, жамбасы сынған. Қазір ақырындап салмақ жинап келеді. Ол үшін күресетін боламыз», - деді Е.Еркінбаев.
Айта кету керек, бұрынғы қожайындары арыстанның күшігін фотосессияға пайдаланып ақша тапқан. Жануарларды қорғау ұйымдарының өкілдері жыртқыштың мүшкіл халін айтып дабыл қаққан болатын.
