Зорлық көрген балалардың 90% басына түскен жағдайды жасырады - Смайылова
КӨКШЕТАУ. ҚазАқпарат - «Балаларды бірге қорғайық» жобасын жүзеге асыру аясында Қазақстан Республикасы Бас прокуратурасының бастамасымен балаларға зорлық - зомбылық көрсетуге қарсылық және қылмыстық құқық бұзушылықтардың алдын алу мақсатында «Не молчи» қоғамдық қорының мамандары жұмыс сапарымен Ақмола облысында болды, деп хабарлайды «ҚазАқпарат» ХАА тілшісі.
Облыстық білім басқармасының мәжіліс залында қала тұрғындарымен кездесу болып өтті. Маңызды тақырыпты қамтитын арнайы фильм көрсетілді. «Не молчи» қоғамдық ұйымының басшысы Дина Смайылованың айтуынша, зорлық - зомбылық көрген балалардың көбі оны айтуға немесе жариялауға бара қоймайды. Ал, бұл өз кезегінде қылмысты анықтап, жолын кесуге кедергі келтіреді.
«Жасөспірімдерге жасалынатын зорлық - бүкіл қоғам үшін қатерлі. Өкінішке қарай, зорлық- зомбылыққа тап болған балалардың 90 пайызы өзінің басына түскен жағдайды жасырады. Ал, бұл өз кезегінде қылмыскерлерді анықтауға кесірін тигізеді», - деді Дина Смайылова.
Аталған қоғамдық бірлестіктің белсенділері Көкшетау, Щучинск, Степногорск қалалары мен Астрахан аудандарында 17 кездесу өткізді. Кездесулерге барлығы 1500 адам қатысқан.
