20 қарашада елдегі қандай жолдар жабық

АЛМАТЫ. KAZINFORM – Қазақстанда ауа райына байланысты республикалық маңызы бар автожолдардың бірнеше учаскесінде шектеулер күшінде.

Фото: Абай облысы ПД

«ҚазАвтоЖол» мәліметіне сәйкес, елдегі бірнеше тасжолда көлік қозғалысы қалпына келтірілді.

Солтүстік Қазақстан облысы

2026 жылғы 20 қарашада сағат 07:00-де республикалық маңызы бар «Петерфельд – Архангельское – Новокаменка – Жезқазған – Арқалық – Петропавл» автожолының 0–13 шақырымы аралығындағы учаскеде көліктің барлық түрі үшін қозғалыс ашылды.

Павлодар облысы

2026 жылғы 20 қарашада сағат 06:00-де республикалық маңызы бар келесі автожол учаскелерінде көліктің барлық түрі үшін қозғалыс ашылды:

* «Атамекен – Ертіс – РФ шекарасы», 0–263 км (Атамекен кенті – РФ шекарасы);
* «ҚХР шекарасы – Майқапшағай – Зайсанды айналып өту – Қалбатау – Семей – Павлодар – РФ шекарасы (Үрлітөбе өткізу пункті)», 191–390 км (Мичурино кенті – РФ шекарасы).

Жолдардағы шектеулер

20 қараша сағат 08:00-дегі жағдай бойынша Ақмола облысында республикалық жолдардың екі учаскесінде жылдамдық режиміне шектеу қойылған.

2026 жылғы 19 қарашада сағат 11:50-де ауа райының қолайсыздығына, атап айтқанда қалың тұманға байланысты республикалық маңызы бар KAZ02 «Астана – Көкшетау (айналма жолмен) – Петропавл – РФ шекарасы (Жаңа жол өткізу пункті – Айдарлы ауылы)» автомобиль жолының 18–124 шақырымы аралығында көліктің барлық түрі үшін жылдамдық режимі сағатына 140 шақырымнан 110 шақырымға дейін төмендетілді.

2026 жылғы 19 қараша сағат 21:50-ден бастап ауа райының қолайсыздығына байланысты республикалық маңызы бар KAZ01 «Астана – Қарағанды – Алматы» автомобиль жолының 30–92 шақырымы аралығында (Жібек жолы ауылы – Анар станциясы) көліктің барлық түрі үшін жылдамдық режимі сағатына 140 шақырымнан 100 шақырымға дейін төмендетілді.

Еске салайық, бұған дейін Солтүстік Қазақстан облысында жол жабылғанын жазғанбыз.

Сондай-ақ Алматы облысында үш жол көктемге дейін жабылды.