Операция барысында полиция шетелдіктер көп тұратын жерлерді, құрылыс нысандарын, базарларды, шетелдіктердің жалдамалы еңбегін пайдаланатын ұйымдар мен жұмыс берушілерді тексерген.
«Операцияның 8 күнінде 9 213 көші-қон заңнамасын бұзушылық анықталды. Оның ішінде 5 113-і шетелдіктердің елде болу мерзімін бұзуымен байланысты. Өздеріне келген шетелдіктер туралы полицияны уақтылы хабардар етпегені үшін 3 631 жеке және заңды тұлға жауапқа тартылды», - деді Ішкі істер министрлігінің онлайн-брифингісінде ведомство өкілі Шұғыла Тұрлыбек.
Көші-қон заңнамасын бұзушыларды елден шығару туралы 674 сот шешімі шығарылды.
«Барлық шығарылған адамдарға Қазақстанға кіруге 5 жылға тыйым салынды. Өз елінде қылмыс жасағаны үшін іздеуде жүрген 22 шетелдік ұсталды. Рейд жүргізу кезінде Жамбыл облысында елімізге заңсыз кірген Пәкістанның 9 азаматы ұсталды. Алматыда 2022 жылғы қарашада мемлекеттік шекараны заңсыз кесіп өткен Қырғыз Республикасының азаматы ұсталды. Осы фактілер бойынша сотқа дейінгі тергеу, сондай-ақ заңсыз иммигранттарға баспана берген адамдарға қатысты да тергеу жүргізіледі», - деді Ш. Тұрлыбек.