АҚШ пен Иранның келіссөз топтары қақтығысты тоқтату жөніндегі диалогты жалғастыру үшін апта соңына қарай Исламабадқа қайта оралуы мүмкін. Бұл туралы сейсенбі күні пәкістандық және ирандық ресми тұлғалар мәлімдеді, деп жазады Reuters.
AlJazeera хабарлауынша, келіссөздерді өткізу үшін екі нұсқа қарастырылып жатыр: Исламабад пен Ыстанбұл.
АҚШ президенті Дональд Трамп New York Post басылымына берген сұхбатында жаңа раунд «келесі екі күн ішінде» өтуі мүмкін екенін айтып, Вашингтон келіссөздерді қайтадан Пәкістанда өткізуге бейім екенін нақтылаған.
Кездесудің нақты күндері әлі келісілмеген, алайда БАҚ өкілдері оның жұма мен жексенбі аралығында өтуі мүмкін екенін хабарлап отыр.
Келіссөздердің негізгі тақырыптары Иранның ядролық бағдарламасы, Ормуз бұғазын бақылау және санкциялық режим болып отыр. АҚШ Иранның ядролық қызметін 20 жылға дейін тоқтатуды талап етіп отыр, ал Тегеран бұл мерзімді үш-бес жылдан аспауын ұсынады. Сонымен қатар, тараптар ұстанымдардың біршама жақындағанын атап өтуде.
Пәкістанның делдалдық күш-жігерін Израильдің Ливанда «Хезболлаға» қарсы шабуылдарын жалғастырып жатқаны қиындатып отыр. Израиль мен АҚШ бұл әрекеттер бітім туралы келісімге жатпайтынын айтса, Иран керісінше пікірде.
Келіссөздер Таяу Шығыстағы шиеленіс жағдайында өтіп жатыр. АҚШ пен Израиль арасындағы соғыс басталғалы бері 28 ақпанда Иран Ормуз бұғазын өз кемелерінен басқа барлық кеме үшін іс жүзінде жауып тастаған. Тегеран бұл өткел тек ирандық бақылауда және ақы төлеу арқылы ғана ашылатынын мәлімдеді.
Бұрын осы бұғаз арқылы әлемдік мұнай мен газ жеткізілімдерінің шамамен бестен бірі өтетін, бұл ауқымды салдарға әкелді.
Жауап ретінде АҚШ әскери күштері дүйсенбіден бастап иран порттарына және олардан шығатын теңіз тасымалын шектеуге кірісті. Тегеран бұғаз арқылы өтетін әскери кемелерге соққы беруі мүмкін екенін және Парсы шығанағындағы көрші елдердің порттарына қарсы жауап шараларын қолданатынын ескертті.
Сонымен қатар, АҚШ вице-президенті Джей Ди Вэнс Fox News телеарнасына берген сұхбатында Иранмен өткен келіссөздерде айтарлықтай прогресс болғанын айтып, олардың сәтсіз аяқталды деген хабарларды жоққа шығарды.
Бұған дейін Иран мен АҚШ Пәкістандағы келіссөздерде қақтығысты тоқтату жөнінде келісімге келе алмағаны хабарланған болатын.
Сондай-ақ делдалдар АҚШ пен Иран арасындағы келіссөздерді қайта бастауға тырысып жатқаны туралы жазғанбыз.