Куәгерлердің айтуынша, Стивен Апопка көлінде қармағына түскен балықты жағаға шығарып, жанындағы серігінен олжасымен бірге суретке түсіруді сұраған. Сол сәтте судан қолтырауын шығып, оның аяғынан тістеп, сүйреп әкеткен.
Арада біраз уақыт өткен соң қолтырауын зейнеткерді қайтадан су бетіне шығарғанымен, оны жібермеген. Тергеушілердің болжауынша, соңында балықшы суға батып кеткен.
Уинтер-Гарден полициясының хабарлауынша, су айдынында қолтырауындар көп болғандықтан, құтқарушылар оқиғаға бірден араласа алмаған. Өрт сөндіру қызметінің басшысы Хосе Гайнсаның айтуынша, ер адамның денесі судан шамамен екі сағаттан кейін шығарылған.
Табиғатты қорғау инспекторлары аллигаторды өлтірді
Полиция Флорида штатының балық және жабайы табиғатты қорғау комиссиясымен бірлесіп, оқиғаны тергеуге кірісті. Бұдан бөлек, жабайы табиғатты қорғау инспекторлары шабуылға қатысы бар деп болжанған қолтырауынды ұстап алған.
Әуеден түсірілген кадрларда 6 адамның алып бауырымен жорғалаушыны судан шығарып, жағаға сүйреп жатқаны көрінеді. Инспекторлар оның аузын байлап, жануарды өлтірген.
Флорида штатының деректеріне сәйкес, 1948 жылдан бері қолтырауындардың шабуылынан барлығы 34 адам қаза тапқан. Олардың екеуі 2026 жылы көз жұмған.
2025 жылы қолтырауын 61 жастағы әйел отырған каноэні аударып жіберген. Ал 2023 жылы қолтырауын итін серуендетуге шықпақ болған 85 жастағы әйелді өз бақшасынан суға сүйреп әкеткен.
Айта кетейік, Аустралияда қолтырауындар мекендейтін өзенде Олимпиада жарыстары өтеді.
Бұған дейін Аустралия полициясы су тасқынынан кейін елде қолтырауындар көбейгенін айтып, тұрғындарға ескерту жасады.