Ақшаға құнығып, аңдарды азаптаған Ақтаудағы жылжымалы зообаққа тексеріс жүргізіледі
АҚТАУ. KAZINFORM – Ақтауда 1-ықшам ауданда орналасқан жылжымалы зообаққа қатысты тексеріс жүргізіледі. Бұл туралы ҚР Ауыл шаруашылығы министрлігі Ветеринарлық бақылау және қадағалау комитетінің Ақтау қалалық аумақтық инспекция мәлімдеді. Бұл туралы Lada.kz сайты жазды.
Мамандардың мәліметінше, табиғат қорғау прокуратурасының тапсырмасы мен қоғамдық ұйымдардан түскен өтініш негізінде 2015 жылғы 29 қазандағы № 375-V ҚРК «Кәсіпкерлік кодексінің» 144-2-бабы (Бақылау және қадағалау субъектісін (объектісін) барып тексеру арқылы профилактикалық бақылау) бойынша құқықтық статистика органдарына тиісті тіркеу материалдары дайындалып жатыр.
— Аталған ұйым бизнес субъектісі болғандықтан, тексеруді тіркеу міндетті болып табылады. Тексеру нәтижелері туралы қосымша хабарлаймыз, — деп мәлімдеді Ақтау қалалық аумақтық инспекциясы.
Еске сала кетейік, еріктілер жабайы жануарлар мен құстар өте қолайсыз жағдайда тіршілік етіп жатқанын мәлімдеген болатын. Осыдан кейін табиғат қорғау прокуратурасы жануарларды ұстау шарттарын тексеруді тапсырды.
Еріктілердің айтуынша, торлар тар әрі лас, жылыту жүйесі жоқ. Жануарлар өз нәжісінің үстінде жатып, сол жерде қажеттілігін өтеуге мәжбүр. Айналада сасық иіс шығады, ал жануарлардың жүні кір және түйдек-түйдек болып қалған.
Жаға ұстатарлық жағдайда азаппен өмір сүріп жатқан жануарлардың тағдырына алаңдаушылық білдірген еріктілер, аңдар қыңсылап жатқанын хабарлаған. Олардың пайымынша, бұл жануарлардың күтім нормаларын өрескел бұзылғанын көрсетеді. Ішетін су да, тамақ та жоқ. Жануарлар әбден арықтағанын айтқан.
– Жануарларды осындай күйде әкеліп, одан табыс табудың қандай қажеті бар? Бұл жағдайға табиғат қорғау прокуратурасы араласуы керек. Кәсіпкердің қызметін тоқтатып, жануарларды дереу алып кетуі қажет. Біздің ұйым бұл мәселені шешуге қосымша ақпарат пен көмек көрсетуге дайын, – деп мәлімдеді волонтерлер.
Еске сала кетейік, бұған дейін Көлсай көлдерінде күшіктерін ерткен қар барысы фототұзаққа түсіп қалғанын жазған едік.