АҚТАУ. KAZINFORM — Тұрғындар 19 бен 16 шағын аудандардың ортасындағы автокөлік жолын жауып, жергілікті биліктен су беруді талап етті. Полиция қызметкерлері жол көлік апатының алдын алу мақсатында, жиналғандардан жолдан шығуды сұрады. Содан соң тұрғындарға Ақтау қаласы әкімінің міндетін атқарушы Нұртас Сали келіп, ауыз су тапшылығын жою үшін жасалып жатқан шараларды түсіндірді.
Еске салайық, бүгін Маңғыстау атом энергия комбинатының өкілі Владимир Васильев қалада су тапшылығы қайтадан туындағанын хабарлады. Оған аптап ыстықтан теңіз суы температурасының көтерілуі мен ауыз суды тұтыну көлемінің күрт артуы себеп болған. Сондықтан шаһарда бірінші кезекте тұрғындарға ауыз су жеткізу үшін, көлік жуу орындарының жұмысына уақытша шектеу енгізілді.
Айта кетейік, Ақтаулықтар бұған дейін де жолды жапқан болатын.
Аягөз Ізбасарова
Ізбасарова Аягөз Оралбайқызы телевизия саласында 2003 жылдан бері жұмыс істейді. Еңбек жолын «Қазақстан» РТРК» АҚ Маңғыстау облыстық филиалы «Қазақстан-Ақтау» телеарнасында жүргізуші-редакторлықтан бастап, редактор, шеф-редактор қызметтерін атқарды. Соңғы 7 жылдан бері «Қазақстан» Ұлттық арнасының Маңғыстаудағы меншікті тілшісі. Ақпарат саласының үздігі. Kazinform халықаралық ақпарат агенттігінде 2024 жылғы мамырдан бастап қызмет етеді.