АҚТАУ. KAZINFORM – Ақтауда қызды тонап, ұрып-соқты деген күдікпен ер адам ұсталды. Маңғыстау облыстық полиция департаментінің мәліметінше, күдікті уақытша ұстау изоляторына қамалған.
— Осы іс бойынша тергеу жалғасып жатыр, болған оқиғаның барлық мән-жайлары анықталуда, — делінген хабарламада.
Еске сала кетейік, 17 қарашада Ақтауда түнгі көңіл көтеру орындарының бірінің алдында ер адамның қызды ұрып-соққан бейнежазба тарады. Бейнежазбада ер адам қызды бетінен ұрып, жерге құлатады. Ұрып-соғу мұнымен тоқтамай, сәлден кейін қайта жалғасқан. Кейін жәбірленуші әлеуметтік желіде жігіттің бұған дейін де оған қол көтергенін жазған. Қоғамда резонанс тудырған осы бейнежазбадан кейін полиция күдіктіге қатысты іс қозғады.
Аягөз Ізбасарова
Ізбасарова Аягөз Оралбайқызы телевизия саласында 2003 жылдан бері жұмыс істейді. Еңбек жолын «Қазақстан» РТРК» АҚ Маңғыстау облыстық филиалы «Қазақстан-Ақтау» телеарнасында жүргізуші-редакторлықтан бастап, редактор, шеф-редактор қызметтерін атқарды. Соңғы 7 жылдан бері «Қазақстан» Ұлттық арнасының Маңғыстаудағы меншікті тілшісі. Ақпарат саласының үздігі. Kazinform халықаралық ақпарат агенттігінде 2024 жылғы мамырдан бастап қызмет етеді.