ОРАЛ. KAZINFORM — Оралда криминалдық полиция қызметкерлері мемлекетаралық іздеуде болған Ақтау қаласының 28 жастағы тұрғынын қолға түсірді.
БҚО полиция департаментінің баспасөз қызметінен мәлім еткеніндей, алаяқ биылғы қаңтар-сәуір айларында 10 пайыз табыс болады деп Ақтау тұрғынын алдаған.
Оның сеніміне кіріп, 58 миллион теңгеден астам қаржысын иемденді деген күдікке ілінген.
— Күдікті уақытша ұстау изоляторына қамалды, ал оның ұсталғаны жөнінде бастамашы орган — Маңғыстау облыстық полиция департаментіне хабарланды. Бұдан бөлек, тергеу мен соттан жасырынған тұлғаларды анықтау бойынша жүргізіліп жатқан жүйелі жұмыстың нәтижесінде жыл басынан бері БҚО полицейлері іздеудегі 54 адамды ұстаған, — деп хабарлады ведомстводан.
Еске сала кетейік, бұдан бұрын БҚО-да аса ірі көлемде алаяқтық жасаған күдікті іздестіріліп жатқанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).