Үкімет басшысының айтуынша, Ақтөбе - Қазақстан қалаларының ішіндегі жедел қарқынмен дамып келе жатқан қалалардың бірі, Мемлекет басшысы бұл өңірді Жолдауында Астана, Алматы және Шымкент қалаларынан кейінгі агломерациялық орталықтардың бірі ретінде атап өткен.
- Ақтөбе агломерациясын өнеркәсіпті, оның ішінде металлургия, химия өнеркәсібі, құрылыс материалдары, логистиканы артықшылықпен дамыта отырып, индустриалдық-инновациялық орталық ретінде дамыту көзделіп отыр. Ақтөбеде бірқатар өнеркәсіптер шоғырланған, бұл жерде мұнай, газ өндіріледі, агроөнеркәсіптік кешен дамып келеді. Ал, ең бастысы, 100-300 шақырым радиуста ауқымды нарықтар бар, - деді С. Ахметов.
Облыстың өнеркәсіптік өндірістерін аралаған Үкімет басшысы көргендеріне көңілі толғанын білдірді.
- Өңірде өнеркәсіптік кәсіпорындар іске қосылуда, АӨК, құрылыс саласы дамуда. Мұның бәрі бірінші кезекте Мемлекет басшысының ең басты тапсырмасы - халықты жұмыспен қамту мәселелерін шешеді. Экономиканы әртараптандыру, құрылымдық өзгерістер, өнеркәсіпті дамыту аясында ең маңызды мәселелердің бірі - қазақстандықтарды жұмыспен қамту, яғни жаңа жоғары білікті жұмыс орындарын құру. Халықтың әлеуметтік әл-ауқатының жақсаруы осыдан басталады, - деді ол.