Ақтөбеде 26 инвестициялық жоба жүзеге асырылып жатыр

АҚТӨБЕ. ҚазАқпарат – Ақтөбе облысында биыл 26 ірі инвестициялық жоба жүзеге асырылып жатыр. Кәсіпорындардың бір бөлігі пайдалануға берілді, деп хабарлайды ҚазАқпарат тілшісі.

Биыл Ақтөбе облысы экономикасына 410 млрд теңге инвестиция тартылды. Оның 19,5% шетелдік инвестиция құрады.

Осы жылы жоспарланған жобаның жетеуі іске қосылды. Оған 54,5 млрд теңге инвестиция тартылған. Олардың қатарында «ARM wind» ЖШС «Бадамша-1» жел электр стансасы, ​ «Көктас Ақтөбе» АҚ құрылыс материалдары мен силикат кірпіш өндіретін зауыты, «Alina Holding» ЖШС қатты-ұнтақ толтырғыш шығаратын цехы, «Milker» ЖШС құрама жем зауыты бар.

«Инвестиция тарту жұмысы 2021 жылы да жалғасады. Соның ішінде құны 150 млрд теңгеге 18 жоба жүзеге асырылмақ. Сөйтіп 2 мыңнан астам адам жұмыспен қамтылады»,- деді облыс әкімі Оңдасын Оразалин.